Ma chi sapiti viatri nuvidduna
di chiddu chi ognerunu po pruvari
sutta a dda vara, di li trantuliùna
chi si ricivi ‘u cori. Chiacchiariàri
a soccu servi quannu ‘un si capisci
stu sintimentu versu li Misteri
chi jornu dopu jornu ‘ntosta e crisci!
E no! Nun ci ni sunnu, ‘un c’è maneri
di fàrivi capiri stu cuncettu,
st’amuri chi nun è na spaccunata
ma sulu amuri! Fruttu chiaru e nettu
di na passioni chi fu curtivata!
Ma hi sapiti viatri nuvidduna
di sèntiri ‘u prufumu di la cira
chi agghiummunìa lu cori. ‘Un si n’adduna,
lu vostru cori, no! Nun ci la fira
picchì nun c’jistu appressu a ‘i vostri patri
di nicareddi ‘n mezzu ‘a prucissioni
a spàrtiri mumenti cu tant’àutri,
mumenti chini a zeppu d’emozioni.
Allura, nuvidduna, chi sapiti
di tuttu chistu, consuli, massari,
di ciàcculi dunati! ‘Un v’affinniti
si nun vi dugnu largu di parlari.
Ma chi sapiti viatri d’annacati,
di “Vella”, “Joni”, “Nenia” e “Catanisa”
e di scinnuti, cugna e d’arrancati!
La vostra è sulu boria, sulu ‘mprisa
chi nasci nta sapiddu quali funnu
e veni a galla tràstula e tagghienti.
Pinsati d’agguantàrivi lu munnu
ma è giustu chi sapiti chi c’è genti
chi pi sta prucissioni s’ammazzatu!
Nun vi pirmettu ‘nùtili pinseri
versu sta genti chi s’ha nutricatu
di sulu PANI e ‘anticchia di MISTERI!
